Жонка сына старшыні КДБ, супрацоўніца Белтэлерадыёкампаніі Лізавета Церцель (у дзявоцтве Лакотка) збіраецца паехаць у Маямі і падала дакументы на амерыканскую візу. Пра гэта заявіла аб’яднанне былых беларускіх сілавікоў BYPOL.
Паводле звестак BYPOL, Лізавета Аляксандраўна Церцель у канцы 2022 года звярнулася па візу ў амбасаду ЗША ў Астане (Казахстан). Падчас праверкі заявы там высветлілі, што яе свёкар — кіраўнік КДБ Іван Церцель, які з 21 чэрвеня 2021 года знаходзіцца ў персанальным санкцыйным спісе ЗША.
У заяве Лізаветы на візу было пазначана, што яна збіраецца паехаць у Маямі (штат Флорыда, ЗША) 16 чэрвеня 2023 года. Пражыванне было запланаванае ў гатэлі the Mutiny Luxury Suites Hotel. Гэта чатырохзоркавы гатэль на беразе бухты Сэйлбат, нумар там на гэтую дату каштуе ад 217 даляраў за ноч.
Асобай, якая аплачвае выдаткі, названы муж Лізаветы — Міраслаў Іванавіч Церцель. BYPOL адзначае, што ён дзейны супрацоўнік КДБ і служыць ва ўпраўленні па Мінску і Мінскай вобласці.
Акрамя таго, вядома, што жанчына падала дакументы на атрыманне шэнгенскай візы.
Працуе 28-гадовая Лізавета Церцель, як гаворыцца ў дакументах, у Белтэлерадыёкампаніі на пасадзе рэдактара аддзела крымінальных навін галоўнай дырэкцыі АТН. Белтэлерадыёкампанія таксама знаходзіцца ў санкцыйных спісах ЕС і ЗША з 2022 года.
У заяве на візу пералічваюцца папярэднія замежныя паездкі. За апошнія пяць гадоў жонка супрацоўніка КДБ пабывала ў Швецыі, Польшчы, Літве, Эстоніі, Албаніі, Непале.
BYPOL паведамляе, што перадаў усю інфармацыю, якую мае, пра дзейнасць сям'і Церцель «па ўдзеле ў захопе і ўтрыманні ўлады неканстытуцыйным шляхам» упаўнаважаным асобам ЗША і ЕС для прыняцця адпаведных рашэнняў.
Дарэчы, у дзень публікацыі паведамлення BYPOL, 22 лютага, кіраўнік КДБ Іван Церцель, выступаючы на сумесным паседжанні Палаты прадстаўнікоў і Савета Рэспублікі, заявіў, што яго ведамства фіксуе «рэзкую актывізацыю ўсіх відаў разведкі спецслужбаў калектыўнага Захаду» супраць Беларусі і з пачатку года затрымала «больш за дзесяць здраднікаў» у сілавых структурах і дзяржапараце. Пра гэта ён заявіў, прадстаўляючы законапраект, які прадугледжвае смяротнае пакаранне для чыноўнікаў за дзяржаўную здраду.